पहिलो निर्वाचित सरकार
पहिलो निर्वाचित सरकार
वि.सं. २००७ साल फागुन ७ गते राजा त्रिभुवनले संविधानसभाको चुनाव गराउने घोषणा गरेका थिए। त्यसको आधारमा वि.सं. २०१५ साल फागुन ७ गते प्रतिनिधिसभाको तल्लो सदनका लागि आमनिर्वाचन सुरु भयो र वि.सं. २०१६ साल वैशाख २८ गते चुनावको नतिजा सार्वजनिक गरियो।
यस चुनावमा नेपाली कांग्रेसले अत्यधिक बहुमत प्राप्त गर्यो। त्यसैको आधारमा कांग्रेस नेता विश्वेश्वर प्रसाद कोइरालाको नेतृत्वमा वि.सं. २०१६ साल जेठ १३ गते नेपालमा पहिलो निर्वाचित सरकार गठन भयो।
वि.सं. २०१६ असार १६ गते प्रतिनिधिसभाको पहिलो अधिवेशन सुरु भयो। सोही वर्ष असोज महिनामा बिर्ता प्रथा उन्मूलन विधेयक पारित भयो र जिल्ला विकास बोर्डहरू गठन गरियो।
तर, वि.सं. २०१७ साल पुष १ गते राजा महेन्द्रले संविधानको धारा ५५ को प्रयोग गर्दै बि.पी. कोइरालाको मन्त्रिमण्डल विघटन, संसद्को दुवै सदन भंग तथा संविधानका विभिन्न धाराहरू निलम्बन गरे। यससँगै शासन अधिकार राजाको हातमा गयो।
यसरी, वि.सं. २००७ सालमा सुरु भएको प्रजातन्त्र राजा महेन्द्रको २०१७ सालको शाही कदमसँगै अवसानमा पुगेको थियो।
