राष्ट्रसंघीय शान्ति मिसनमा सबैभन्दा बढी सेना पठाउने देश, “नेपाल”
संयुक्त राष्ट्रसङ्घीय शान्ति सेना परिचालनको वेबसाइटले उपलब्ध गराएको पछिल्लो तथ्याङ्क अनुसार नेपाल अर्को दक्षिण एसियाली राष्ट्र बंगलादेशलाई उछिन्दै सबैभन्दा धेरै सेना परिचालन गर्ने राष्ट्र बनेको छ ।
- नेपालले सन् १९५८ देखि संयुक्त राष्ट्रसङ्घीय पर्यवेक्षक समूह (United Nations Observer Group in Lebanon (UNOGIL)) लेबनानमा पाँच पर्यवेक्षक पठाएर संयुक्त राष्ट्रसंघको शान्ति प्रयासमा सहभागी हुन थालेको थियो।
- पुरानो गोरख गणलाई सन् १९७४ मा संयुक्त राष्ट्रसंघीय आपतकालीन बल (United Nations Emergency Force (UNEF–II)), इजिप्टमा पहिलो नेपाली टोलीको रूपमा पठाइएको थियो।
- सन् १९५८ देखि हालसम्म १ लाख ४९ हजार ८९० नेपाली शान्ति सैनिकले संयुक्त राष्ट्रसंघीय मिसनमा सेवा गरेका छन् । यो संख्यामा नेपाल प्रहरीका ८ हजार ६ सय १५ र सशस्त्र प्रहरी बलका ८ हजार ७ सय ८५ सदस्य रहेका छन् ।
- नेपाली सेनाका अनुसार कंगो, दक्षिण सुडान, अबेई सुडान, पश्चिमी सहारा, इजरायल, लेबनान, माली, सिरिया, सेन्ट्रल अफ्रिकन रिपब्लिक, इराक र यमनमा नेपाली शान्ति सैनिक तैनाथ छन् ।
- संयुक्त राष्ट्रसंघीय शान्ति स्थापना कार्यमा नेपाली सेनाको सहभागिता ६४ वर्ष लामो र ४४ संयुक्त राष्ट्र नियोगहरू समेटिएको छ।
- नेपाली सेनाका अनुसार शान्ति सेनाको सम्पूर्ण यात्रामा ७३ नेपाली शान्ति सैनिकको मृत्यु भएको छ भने ६८ जना घाइते भएका छन् ।
